१०औँ वार्षिकोत्सवको अवसरमा होटल पौवाले देशभरका शाखाका ‘स्वाद उत्सव’ गर्दै

शाख न्यूज    प्रकाशित: २०८२-१२-२४ गते   १२० पटक हेरिएको

नेपालगञ्ज - होटल पौवाले आफ्नो १०औं वार्षिकोत्सवको अवसरमा नेपालगञ्जसहित देशभरका सबै शाखामा  ‘स्वाद उत्सव’ आयोजना गर्ने भएको छ । साथै नयाँ वर्ष २०८३ को पूर्व सन्ध्यामा नेपालगञ्जमा ‘शुभकामना साँझ–२०८३’ कार्यक्रम पनि हुने होटल पौवाले जनाएको छ । 

स्वदेशी लगानी, सामूहिक स्वामित्व र नेपाली आतिथ्य संस्कृतिमा आधारित होटल पौवाले १० वर्ष पूरा गरेको अवसरमा विशेष कार्यक्रमहरु गर्न लागेको हो । पौवाका अनुसार चैत २६, २७ र २८ गते तीन दिनसम्म सञ्चालन हुने ‘स्वाद उत्सव’ मा नेपाली परिकार र आतिथ्य अनुभव प्रदान गरिनेछ ।

नयाँ वर्षको स्वागतमा चैत ३० गते नेपालगञ्ज शाखामा आयोजना हुने ‘शुभकामना साँझ–२०८३’ मा चर्चित कलाकारहरूको सांगीतिक प्रस्तुति रहने जनाइएको छ । कार्यक्रममा गायक कमल खत्री, गायिका समीक्षा अधिकारी लगायत कलाकार सहभागी हुनेछन् । साथै स्थानीय सांस्कृतिक समूहहरूको प्रस्तुति पनि रहनेछ ।

होटल पौवाले नेपाली कला, संस्कृति र परम्परालाई प्रवर्द्धन गर्दै विभिन्न चाडपर्वमा विशेष कार्यक्रम गर्दै आएको जनाएको छ । यसअघि पनि तिहार, माघे संक्रान्ति, महाशिवरात्रि लगायतका अवसरमा विशेष कार्यक्रम आयोजना गरिएको थियो ।हाल होटल पौवाका देशभर २० भन्दा बढी शाखा सञ्चालनमा रहेका छन् । 

वार्षिकोत्सवकै अवसरमा होटल पौवाले लगानीकर्ता र साझेदारहरूसँग भावी योजना र विस्तार रणनीतिबारे छलफल गर्न ‘लगानी सम्मेलन’ समेत आयोजना गर्ने तयारी गरेको छ । पत्रकार सम्मेलनमा बोल्दै होटल पौवाका अध्यक्ष दुर्गाप्रसाद भण्डारीले १९ जनाको लगानीबाट सुरु भएको पौवामा २५० बढी लगानीकर्ता, १ हजार बढी कर्मचारी र २० वटा शाखा विस्तार भएको जानकारी दिए । आगामी चैत्र २८ गते लगानीकर्ताहरुबीच लगानी सम्मेलन आयोजना गरिएको जनाउँदै अध्यक्ष भण्डारीले आगामी १० वर्षमा १०० शाखाको लक्ष्य पूरा हुने दृढता ब्यक्त गरे ।

उनले पौवामा कार्यरत कर्मचारीलाई नै शेयर सदस्यमा थप्दै पौवाले युवाहरुको विदेश पलायनलाई निरुत्साहित गर्ने प्रयास गरिरहेको दाबी गरे । ‘कर्मचारीलाई शेयर धनी बनाउँदै लैजाँदा संस्थाप्रति अपनत्व बढ्ने र स्वदेश मै केही गर्न सकिन्छ भन्ने आत्मविश्वास बढेको पाएका छौं,’ उनले भने, ‘विदेश पलायनलाई केही नियन्त्रण गर्न यो अभियान सफल देखिएको छ ।’ पत्रकारहरुको प्रश्नको जवाफ दिँदै भण्डारीले पौवा स्थापना अघि संचालनमा रहेको पैचो पसल सञ्चालनको अनुभवका आधारमा नेपालमै उत्पादन भएको होटल रेसीपीबाट पनि होटलमा छुट्टै स्वाद दिन सकिने देखेर पौवाको जन्म भएको जानकारी दिए ।

तीन दिनसम्म सञ्चालन हुने स्वाद उत्सवमा होटल पौवाका सबै शाखाहरूमा विशेष अतिथि सत्कारसहित नेपाली रैथाने स्वाद दिएर ग्राहकहरूलाई छुट्टै अनुभव र आनन्द प्रदान गर्ने कार्यक्रम राखिएको होटल पौवा नेपालगन्जका महाप्रबन्धक गिरीराज पाण्डेले बताए । कार्यक्रममा सहभागी हुन देशभरका शाखाहरूबाट ४० हजार भन्दा बढी निमन्त्रणापत्र वितरण गरिएको पाण्डेले बताए । चैत्र २५ गते स्थापना दिवसका अवसरमा देशैभरका शाखाहरुले बिभिन्न सामाजिक कार्य गर्ने तय भएको पनि भण्डारीले बताए । भण्डारीका अनुसार नेपालगन्ज शाखाले मानव सेवा आश्रमका आश्रितहरुलाई खाना खुवाउने कार्यक्रम रहेको छ । पत्रकार सम्मेलनमा नेपाल पत्रकार महासंघ बाँकेका अध्यक्ष नवीन गिरीले पनि शुभकामना मन्तब्य ब्यक्त गरेका थिए । कार्यक्रम सञ्चालन होटल पौवाका शेयर सदस्य एवम् पत्रकार शरण कर्माचार्यले गरेका थिए । 

© Copyright 2020 Sakhanews. All rights reserved.
सस्तो नभई भरपर्दाे वेबसाईट बनाउन सम्पर्क : ९८०१०३५९०५
Design & Developed By : Journey For Tech